መንግስትና ትልቁ የተቃዋሚ ፓርቲ መድረክ ለመጀመሪያ ጊዜ ተገናኘተው ተነጋገሩ

pm-bp

ጠ/ሚ ሃይለ ማሪያምና የመድረክ ሊቀ መንበር ፕሮፌሰር በየነ ጴጥሮስ ተገናኝተው መነጋገራቸው ታውቋል። ጠ/ሚኒስትሩ መንግስት ከመድረክ ጋራ ለመወያየት ፈቃደኛ መሆኑን የገለጡ ሲሆን ፕሮፌሰር በየነም ለውይይቱ ዝግጁ መሆናቸውን ገልጸውላቸዋል። ይህ የሆነው ባለፈው ወር ሲሆን ከዚያ በኋላ ግን እንዳልተገናኙና እየጠበቁ እንደሆነ የመድረክ መሪ ተናግረዋል።
የኢትዮጵያ ችግር የሚፈታው በውይይትና በመግባባት ነው። ውይይቱም ከአንድ የተቃዋሚ ፓርቲ ጋር ብቻ ከሚሆን በሀገር ውስጥም በውጭ ከሚንቀሳቀሱት ሁሉ ጋር መሆን ይኖርበታል ብለን እናምናለን። ከእንግዲህ ሰው እንዳይሞት፥ ፍትህና ሰላም በኢትዮጵያ እንዲሰፍን እንፀልይ፥ድርሻችንንም እንወጣ።

Advertisements

የትረምፕ ፕሬዚደንትነት ገና አልተረጋገጠም፤የክሊንተን የመመረጥ ዕድል ሙሉ ለሙሉ አላበቃም

ማሳሰቢያ፤ይህ ጽሁፍ ለመረጃ፥ለዕውቀትና ለጸሎት ርዕስ እንጂ ማንንም ለመደገፍ ወይንም ለመንቀፍ የተጻፈ አይደለም።

“በሰው ልብ ብዙ አሳብ አለ፤ የእግዚአብሔር ምክር ግን እርሱ ይጸናል”ምሳሌ19:21
ምንም እንኳን ትረምፕ ምርጫውን አሸነፈ ቢባልም የአሜሪካ ህገ መንግስት ፕሬዚደንት እንዳይሆን የሚፈቅድ ቀዳዳ ይከፍታል። ኮንግረስ ፕሬዚደንቱን ኦፊሻሊ መርምሮ የሚያፀድቀው January 6, 2017 ነው። ከዚያ በፊት ኤሌክቶራል ኮሌጅ የተባሉት የየስቴቱ ተወካዮች December 19,2016 ኦፊሻሊ ምርጫ ያደርጋሉ። የፕሬዚደንቱ ሹመት ያኔ የሚወሰን ይሆናል።በዚሁ መሰረት እነዚህ የመጨረሻ ውሳኔ በዚያን ቀን የሚሰጡ ሲሆን ሃሳባቸውን መቀየር ይችላሉ።የሚያካሄዱትም የመጨረሻ ውሳኔ በስውር ድምጽ ስለሆነ የትረምፕ ፕሬዚደንትን ካልፈለጉ አብዛኛውን የህዝብ ድምፅ ያገኘችውን ሂለሪን መምረጥ ይችላሉ ወይም ለትረምፕ ድምጻቸውን በመንፈግና ቁጥሩን ከ 270 በማውረድ ኮንግረስ ውሳኔ እንዲሰጥበት ማድረግ ይችላሉ።በብዙ ሚሊዮን የሚቆጠሩ መራጮች ለተወካዮቹ ፔቲሽን እያስገቡ ነው።ባኦኪ ቩ የተባሉ የጆርጂያ ሪፓብሊካን የኤለክቶሬቱ አባል ለትረምፕ ድምፅ እንደማይሰጡ ከወዲሁ አሳውቀው ነበር፤ጥቂቶች እንኳን ባያጸድቁትና ከ270 ድምፅ በታች ከሆነ ኮንግረሱ የሚቀጥለውን ፕሬዚደንት በድምጽ ብልጫ ይወስናል። ምክትል ፕሬዚደንት ደግሞ በሴኔቱ ሊመረጥ ይችላል።

ከዚህ በተጨማሪ ዶናልድ ትረምፕ እስካሁን ያለባቸው የፍርድ ቤቶች ክስና ከባህሪያቸው አንጻር ካሁን በኋላም ሊፈጽሙት ከሚችሉት የህግ መተላለፍ አንፃር ወደ ኢምፒችመንት ወይም ከስልጣን የሚያስወርድ ክስ ነገሩ ሊሄድ ይችላል የሚሉ አሉ።
እነዚህ ሁለት ጉዳዮች ማለትም የኤሌክቶራል ተወካዮች የDecember 19 የመጨረሻ ውሳኔና ከፕሬዚደንትነት ሊያስነሳቸው የሚችሉ ክሶች እድል አናሳ ቢሆንም የመሆን ዕድል አለው። እንዲያውም አንዳንድ ታዋቂ ተንታኞችና ሚዲያዎች የተወካዮችን ውሳኔ ቢያልፉም ተከሰው ስልጣን መልቀቃቸው አይቀሬ እንደሆነ በእርግጠኝነት ይናገራሉ።
ለሁሉም ህጉን ማወቁና ያለውን ሁኔታ በቅርብ መከታተል ይጠቅማል። የምንሰጣቸው አስተያየት፥ልንወስድ ያሰብናቸው እርምጃዎችና ውሳኔዎች፥እንዲሁም የምናደርጋቸው ጸሎቶች በዕውቀት ቢሆኑ የተሻለ ይሆናል።

እግዚአብሔር አሜሪካንን ይባርክ

clinton-trump-whse

ሂለሪ ወይስ ትረምፕ?

ሂለሪ ወይስ ትረምፕ?
“ከእናንተ…ጥበበኞች አስተዋዮችም አዋቂዎችም የሆኑትን ሰዎች ምረጡ፥ እኔም በላያችሁ አለቆች አደርጋቸዋለሁ።ዘዳግም1:13
trump-clinton
የዘንድሮ የአሜሪካ ምርጫ ፉክክር መከፋፋት የበዛበት፥ በክስና ስድብ የተሞላ ነበር። በዚህ ምክንያት በትምህርት ቤቶች እንኳ ለወትሮው የሚደረገውን ክርክሮችን ሰምቶ የቤት ስራ ለመስራት እስኪያስቸግር ድረስ ለልጆች የማይመች በጣም የወረደ ነበር። ያ ሁሉ አሁን አልፎ የምርጫው ቀን ሁለት ቀን ቀርቶታል። ባለፈው ለኦባማ እንደተደረገው ዘንድሮ ለማናቸውም የምርጫ ቅስቀሳ በኢትዮጵያውያን አልተካሄደም። ምናልባት አንዳቸውንም ለመምረጥ ፍላጎት ከማነሱ የተነሳ ሊሆን ይችላል። ዜግነት ያለው ሁሉ ቢመርጥ መልካም ነው፤አንዱ የዜግነት ሃላፊነት ነውና። የቀድሞው የአፍሪካ አብያተ ክርስቲያናት ዋና ጸሃፊ ኬንያዊው ሬቨረንድ ቱኩምቦ በአንድ ወቅት ኢትዮጵያ መጥተው እንዳሉት “የማይመርጥ ሰው የውሃውን ቁሻሻ ከምንጩ ከማድረቅ ይልቅ ቁሻሻውን ውሃ ለመጠጣት እንደመወሰን ነው”። የሰው ዲሞክራሲ ከእግዚአብሔር ሃሳብ ጋር ብዙ ጊዜ የማይገናኝ ቢሆንም በምድር ላይ ባለው አሰራር ለጊዜው ከዲሞክራሲ የተሻለ ሌላ አማራጭ ስለሌለ በዛ መስመር መሄዱ ግድ ነው። እግዚአብሔር ብቻውን ያለ ምርጫና ዲሞክራሲ የሚመራበት ስርአት ቲኦክራሲ ይባላል።ያ በዚህ ምድር አይሆንም በሚመጣው ዓለም እንጂ። ስለሆነም ለፍትህና ለብልጽግና የተሻለ የምንለውን በመምረጥ ድምጻችንን ማሰማት አለብን። በተለይ በአሜሪካ በክርስቲያንነት የተመዘገበው ህዝብ በመቶ ሚሊዮን የሚቆጠር ስለሆነ ከፍተኛ ተጽእኖ ማድረግ ይችላል። ይሄን ያወቁ ፖለቲከኞች ይህንን ድምጽ ለራሳቸው ለማድረግ የማይጥሩት ጥረት የለም። ክርስቲያኖች የሚወዱትን ጉዳዮች እናደርጋለን በማለት ለማማለል ይጠቀሙበታል እንጂ ብዙ ጊዜ ከልባቸው አይደለም። በዚህ ምክንያት ስልጣን ከያዙ በዃላ ቃላቸውን ሲሽሩ አይተናል። በመሆኑም ስንመርጥ ለጊዜው በቲቪ በምንሰማው ሳይሆን የተወዳዳሪዎችን ታሪክ ወደዃላ መለስ ብሎ በማየት የተሻለውን ማየት ያስፈልጋል። ዲሞክራሲ ማለት ከሁለት ፍጹም ያልሆኑ ሰዎች መሃል ሻል ያለውን መምረጥ ማለት ነው።
አንዳንዶች ሂለሪ በኢሜል ጉዳይ ታማኝነት አጉድላለች፥ጉቦ ተቀብላለች፥ለሚያስወርዱና ለተመሳሳይ ጾታ ጋብቻ ነጻነት ትሰጣለች፥እንደወንጀል አታየውምበኢትዮጵያ የውስጥ ፖለቲካ ጣልቃ በመግባት አድልዎ ታደርጋለች፥ከዲሞክራሲ ይልቅ የአሜሪካንን ጥቅም ታስቀድማለች፥ በፖለቲካ ዓለም እንደመቆየቷ ከወሬ በስተቀር ያመጣችው ለውጥ የለም፥ ከባሏ ቀጥሎ ስልጣን በመፈለግ ፕሬዚደንትነትን በቤተሰብ የሚወረስ የግል ንብረት አደረገችው፥በአክራሪ ሙስሊሞች ጉዳይ ለዘብተኛ ነች፥ስቴት ዲፓርትመንት በነበረችበት ጊዜ ለሞተው አሜሪካዊው አምባሳደርና አሁን ላለው ለሊቢያ ጦርነት ተጠያቂ ናትተወዳጅነትና የሚስብ ነገር የላትም ተብላ ትወቀሳለች። 
ሌሎች ደግሞ ትረምፕ ሴቶችን የሚያንቋሽሽና የሚንቅ፥አፉ በስድብና በነውረኝነት የተሞላ፥ግብር ላለመክፈል ቀዳዳ እየፈለገ የሚሸሽ፥ጥቁሮችን የሚጠላ፥ በገነባቸው ህንጻ ቤት እንዳይከራዩ የከለከለ ዘረኛ፥ ለድሆችና ለስደተኞች የማይራራ ጨካኝ፥የባለጸጎች ተከራካሪ፥ቶሎ የሚቆጣና ለመበቀል የማይመለስ፥ያልበሰለ ጥሬ ሰው ነው ብለው ይከሱታል።በውርጃና በግብረ ሰዶም ጉዳይ ለፖለቲካ ጥቅም ብሎ እንጂ ሃሳቡን በየጊዜው ይቀያይራል ስለዚህ ተግባራዊ አያደርገውም፥በኢትዮጵያ ጉዳይ ምንም እውቀት የለውም፥እንዲያውም ቡሽ በሴፕቴምበር አደጋ ጊዜ እንዳስወጣው የፓትሪዮቲክ ህግ ሪፐብሊካኖች ከዲሞክራሲ ይልቅ ለጸጥታ ቅድሚያ በመስጠት ስለሚታወቁ በኢትዮጵያ ያላቸው ፖሊስ የባሰ ይሆናል፥ለሙስሊሞች ሰብአዊ መብት ግድ የለውም፥ሁሉንም በሽብርተኝነት ያያል፥ ከራሽያ ጋር ባለው ጤናማ ያልሆነ ግንኙነት የአሜሪካንን ጥቅም አሳልፎ ይሰጣል፥አገሮች ሁሉ ኑክሌር ቦምብ እንዲኖራቸው ይፈልጋል ይላሉ።
ትረምፕ ካሸነፈ ምናልባት የመጀመሪያው ያለምንም ቀደምት የፖለቲካ ስራና ልምድ የተመረጠ የሚያደርገው ሲሆን ሂለሪ ከተመረጠች በአሜሪካ ታሪክ የመጀመሪያዋ የሴት ፕሬዚደንት ትሆናለች።
እንግዲህ ጸልየን ውስጣችንን ሰምተን የሚመስለንን እንምረጥ። እንደኛ ያልመረጡትን ሰዎች አናውግዝ፥በዚህ ምድር ፍጹም የሆነ ተወዳዳሪ የለም፥ሁሉም በታየውና በደረሰበት ነው የሚመላለሰው። እርስ በርሳችሁ ተከባበሩ፥ላለመስማማት ተስማሙ።እግዚአብሔር አሜሪካንን ይባርክ።

አስቸኳይ ጥሪ

October 5, 2016

የሀገራችን ሁኔታ ከቀን ወደ ቀን እየተባባሰ ነው። ባለፈው እንደተናገርነው ፍትህ ካልሰፈነና የህዝቡ ጥያቄ ተመልሶ ከተቃዋሚዎች ጋር አስቸኳይ ንግግር ካልተጀመረ የሰዎች መሞት እየቀጠለ ነው።ከኢሬቻ በኋላ እንኳን በተለያዩ የኦሮሚያ አካባቢዎች በተነሳው ግጭት ሰዎች እየሞቱ ነው።
“የሟቹን ሞት አልፈቅድም ይላል እግዚአብሔር”።
ብዙ ሰዎች አክራሪ አቋም ውስጥ ገብተዋል፤ምሬትና እልህ ተባብሷል። በደጋፊም በተቃዋሚም ወገን ያሉ አንዱ አንዱን ለማሸነፍ፥ለማስወገድ እንጂ አብረን እንዴት እንኑር የሚል ሃሳብ ቀርቷል። ሰላማዊ መፍትሄ የምንል ሰዎች ድምጻችን እየተዋጠ “ፍለጠው ቁረጠው” እየገነነ ነው።ይህ ለሃገራችን ያዋጣል? ማንም ላይ ለመፍረድ አይደለም፤በሁለቱም ጎራ ያሉት ከመረዳታቸውና ከብሶታቸው በመነሳት ነው። በ21 ኛው ክፍለ ዘመን እየኖርን መነጋገር አለመቻል አግባብ አይደለም። የሰዎች መሞት መቆም አለበት፥የጥላቻ ዘመቻ መቆም አለበት፥ውይይት መጀመር አለበት።ቫክላቭ ሃቨል የተባለ ሰው “አመጽ አልባ ትግል የመረጥነው ቅዱስ ለመሆን ፈልገን ሳይሆን ማሸነፊያው መንገድ እርሱ ብቻ ስለሆነ ነው፤በአመጽ ከሄድን እንሸነፋለን” ብሏል። መገዳደል ሁኔታውን ከማባባስና የማይረሳ ቂምና ቁርሾ ከማስቀመጥ በቀር አንድ ድርጅት እንኳ ቢያሸንፍ ሌሎቹ ድርጅቶች ትግላቸውን ስለሚቀጥሉ በመሃል ኢትዮጵያ ትሸነፋለች።
ሰሞኑን የነፃ ኦሮሚያ የሽግግር መንግስት አዘጋጅ ተቋማትና ወታደራዊ ክንፍ እንደሚቋቋም ተሰምቷል። በኢትዮጵያ ጦር ባሉ ከአስር አለቃ እስከ ጄኔራል የውስጥ አርበኛ የሰራዊት አባላትና 500,000 (አምስት መቶ ሺ) በሚሆን መሳሪያ የታጠቀ የኦሮሞ ህዝብ ወታደራዊ እንቅስቃሴ እንደሚጀመር ይፋ ሆኗል። ወዴት እየሄድን ነው? ሶስት ነገር ለማሳሰብ እንፈልጋለን፥
1-ጸሎታችንን አጠናክረን እንቀጥል፤”በመንፈሴ እንጂ በሃይልና በብርታት አይደለም ይላል የሰራዊት ጌታ እግዚአብሔር፤ወደ እኔ ጩህ እኔም አመልስልሃለሁ፤አይተህ የማታውቀውን ታላቅና ሃይለኛ ነገርም አሳይሃለሁ፤ለእግዚአብሔር የሚሳነው የለምና”።
2-የሃይማኖት መሪዎች፥የሃገር ሽማግሌዎች፥የሚመለከታችሁ ሁሉ ውይይትና ድርድር ባስቸኳይ እንዲጀመር ዛሬ ነገ ሳትሉ ጥረታችሁን አጠናክሩ።
3-ሌሎቻችን ባገኘነው አጋጣሚ ሁሉ በጥላቻና በበቀል ፈንታ ፍቅርንና ፍትህን እንስበክ። ሁለቱን ሚዛን ማድረግ ቀላል አይደለም፥አንዱን ስትይዙ አንዱ ያፈተልክባችዃል።ለእግዚአብሔር ግን ሁሉም ይቻላል።
እባካችሁ ድርሻችሁን ተወጡ፤ይህን መልእክት ሼር በማድረግ አሁንም ጥላቻን እናሸንፍ፤አዎ፥በመጨረሻ ፍቅርም ፍትህም ያሸንፋሉ! አሜን

መጪው አደጋና መፍትሄው

Oct 3, 2016

mourning

በትናንትናው ዕለት በደብረ ዘይት ቢሾፍቱ የደረሰው እጅግ በጣም አሳዛኝ ክስተት ነው። በበርካታ ቤተሰቦች ዛሬ ሃዘን አለ፤ድንኳኖች ተጥለዋል፥የቀብር ስነስርዓቶች ይፈጸማሉ፤የሟች ወላጆች ብቻ ሳይሆኑ ዘመድ አዝማድ ጎረቤት ወዳጅ ሁሉ በዚህ ጉዳይ ተጎድቷል። እነዚህ ወገኖች ከመላው ኢትዮጵያ የመጡ በመሆናቸው ሀዘኑ አገር አቀፍ ነው።ባጠቃላይ በሀገር ውስጥም በውጭም ያለው ኢትዮጵያዊ ሁሉ ይህ አደጋ አሳዝኖታል፥አንገብግቦታል፥አሳስቦታል፤ ይህ ብቻም አይደለም የሀገሪቱ ጉዳይ ወዴት እየሄደ ነው፥ከኔ ምን ይጠበቃል? የሚል ጥያቄ በውስጡ ይጭራል። እስካሁን የጉዳዩ አሳሳቢነት ገብቷቸው ከጸሎት ጀምሮ የሚችሉትን ሁሉ እያደረጉ ያሉ ወገኖች ቢኖሩም የአሁኑ ክስተት እነርሱም ጥረታቸውን አጠናክረው እንዲቀጥሉ፥ሌሎች ከዳር ቁጭ ብለው የሚታዘቡ ደግሞ በሀገራቸው ጉዳይ ንቁ ተሳታፊ እንዲሆኑ የሚገፋፋ ሁኔታ ነው የተፈጠረው። ዛሬ ለጎረቤታችን ራርተን መፍትሄውን በጋራ ካልፈለግን ነገ የኛንም በር ማንኳኳቱ አይቀርም፤እስካሁን ካልተንኳኳ ማለቴ ነው።
ጉዳዩን በቅርበት ለምንከታተል የትናንቱ የኢሬቻ አደጋ የሚያሳዝን ቢሆንም የማይጠበቅ አልነበረም። በህዝቡ ዘንድ ያለውን ቁጣና ተስፋ መቁረጥ ያየ ሰው እንዲያውም ከዚህ በላይ ለሀገሪቱ ህልውና አደጋ የሆኑ ከፍተኛ ችግሮች እንዳይነሱ ያስፈራል።ምን አልባት የትናንቱ እንደ ትንሽ ነገር የሚታይበት ሁኔታ ማለት ነው። ኢቢሲ የትናንቱን ክስተት ጸረ ሰላም ሃይሎች ያነሳሱት ሲል ሪፖርተር ጋዜጣ ከስፍራው ሆኖ እንደዘገበው የህዝብ ተቃውሞ ብሎታል። የህዝብን ተቃውሞ የጥቂቶች ካደረግነው መፍትሄ አይመጣም።
ባለፈው ያቀረብናቸው 7 የመፍትሄ ነጥቦች የሚከተሉት ናቸው፥
1-በሰላማዊ ሰዎች ላይ ግድያ እንዳይፈጸም እንጠይቃለን።
2-ያልተመጣጠነ ሃይል በመጠቀም በሰልፈኞች ላይ ግድያ የፈጸሙ ወገኖች በአስቸኳይ በህግ ይጠየቁ፤ይሄንንም የሚያጣራ ገለልተኛና በሁሉም ወገኖች ተኣማኒነት ያለው አጣሪ አካል ምርመራውን ያድርግ፤
3-ከተቃውሞ ጋር በተያያዘ ያላግባብ የታሰሩ እንዲሁም በተለያየ ምክንያት በወህኒ ያሉ የፖለቲካ ፓርቲ መሪዎችና ጋዜጠኞች መንግስት ለሰላምና ለመግባባት ሲባል ይፍታ። የእስረኞች ሰብዓዊና ህገመንግስታዊ መብቶቻቸው ተጠብቀው ከቤተሰብና ከጠበቆቻቸው ጋር ያለምንም ተጽዕኖ ይገናኙ፤ፍርድ ቤት የመቅረብ መብታቸው ይጠበቅ፤
ፍርድ ቤቶች ከማንኛውም የፖለቲካ ተጽዕኖ ነፃ ሆነው ፍትህን ይስጡ።
4-ህዝቡ ያቀረበው የፍትህ ጥያቄ በአስቸኳይ ተገቢው ትኩረት ይሰጠው፤ጥያቄዎቹም ይመለሱ።
5-በተለያዩ ወገኖች ያለውን ቁጣ የምንረዳ ቢሆንም ከጥላቻ ንግግሮችና ከዘር ተኮር ስድቦች ከጥቃትና ከሀይል ተግባሮች ሁሉም አካል እንዲቆጠብ እናሳስባለን።እንዲህ አይነት ነገር ሀገር የሚገነባ ሳይሆን የሚያፈርስ ነው። ስሜታችንን ተቆጣጥረን የወደፊት ሀገርን አንድነትና ህልውና ማስጠበቅ መቻል አለብን። እድሉ ያለን ዛሬ ነው። አንዴ ጥላቻው ከቁጥጥር ውጭ ከሆነ መመለሻ አይኖረውም።
6-ይህ ችግር እንዳይደገምና ሀገሪቷ ወደ ለየለት ሁከት እንዳትገባ በሀገር ውስጥም በውጭም ያሉ የሀገሬ ጉዳይ ያገባኛል የሚሉ ኢትዮጵያውያን ሁሉ በተወካዮቻቸው የሚሳተፉበት የውይይት መድረክ ይዘጋጅ፤ይህን ውይይት የሚያመቻች ሁሉም ወገን የሚቀበለው ከሀገር ውስጥና አስፈላጊም ከሆነ ከዓለም አቀፉ ህብረተሰብ የተውጣጣ አካል ባስቸኳይ ይቋቋም። የወደፊቱም የሀገሪቱ አቅጣጫ መግባባትና በልዩነት አንድነት በሚፈጠርበት ሁኔታ ላይ ተመሳሳይ ብሄራዊ መረዳት ላይ ይደረስ።ለዚህም ያለ ማንም የፖለቲካ ተጽእኖ በተለይ የሃይማኖት መሪዎች፤የሀገር ሽማግሌዎች፤የሲቪክ ድርጅቶችና አስፈላጊ ከሆነ ዓለም አቀፉ ህብረተሰብ ድጋፉን ያድርግ።
7-ከዚያ በመቀጠል የሚደረገው ሀገራዊ ምርጫ ሁሉን ያሳተፈና በተቃዋሚውም በዓለም አቀፍ ደረጃም ተኣማኒነት ያለው ይሁን።
እነዚህ ከላይ የዘረዘርናቸው ካልተደረጉ ወዳልታሰበና አላስፈላጊ ክስተት ነገሩ ሄዶ ከቁጥጥር ውጭ እንዳይሆን ያሰጋል።አንዳንዶች ሰላማዊ ውይይት ካሁን በኋላ አይሰራም፥አመጽ ብቻ ነው መፍትሄው ይላሉ።እኛ ግን እንደ ሰላም መልእክተኞች የሰው ነፍስና የሀገር ሀብት እንዳይጠፋ በሰላማዊ መፍትሄ ተስፋ አልቆረጥንም። ኢህአዴግ በመግለጫው አንድ ነገር ብሏል፥ ለለውጥ ስለሚያነሳሳን ህዝቡ ሰላማዊ ተቃውሞውን፥ትግሉን ይቀጥል ብሏል። መንግስት ላይ ህዝቡ ሰላማዊ ግፊቱን በመጨመር ህዝቡ ራሱ በመረጠው መንገድ መመራት ይኖርበታል ብለን እናምናለን።
እግዚአብሔር የሟች ቤተሰብ ያጽናናልን።

ዳንኤል ጣሰው

ፍትህ ከሌለ ሰላም የለም

ፍትህ ከሌለ ሰላም የለም
በዚህ አጋጣሚ በኦሮሚያ፥በአማራ በቂሊንጦ ወህኒ ቤት የሞቱት፥ ሰሞኑን በደምቢ ዶሎ ልጇ የተገደለባት እናት ታሪክ ዘግናኝና የሚያስቆጭ ነው።ለሁሉም የተሰማንን ጥልቅ ሀዘን እንገልጻለን። ግድያውም አሁኑኑ እንዲቆም፥ወታደሩ ወደ ካምፑ እንዲመለስ፤ ማንም የጸጥታ አካል በህዝብ ላይ እንዳይተኩስ እናሳስባለን።በዚህ በ21ኛው ክ/ዘመን እያንዳንዷ ሂደት በማስረጃ ስለተያዘች ነገ በሀገር ውስጥም በዓለም አቀፍ ህግም ስለሚያስጠይቅ ከፍተኛ ጥንቃቄ ያስፈልጋል።ይህን የፈፀመ ያስፈፀመ ነገ ከተጠያቂነት አይድንም።
ባለፈው ለሀገራችን መፍትሄ የሚሆኑ 7 ነጥቦች ያወጣንበት ጽሁፍ በ ethiopiariseandshine.com ይገኛል።ይህ መልእክት ከተቃውሞ ጋር በተያያዘ የታሰሩ እንዲሁም ከዚህ ቀደም የተፈረደባቸው የፖለቲካ ፓርቲ መሪዎችና ጋዜጠኞች ለሰላምና መግባባት ሲባል ይፈቱ፥ በህዝብ ላይ የተኮሱ ለፍርድ ይቅረቡ የሚለውና ሌሎችም ሃሳቦች ያሉበት ነው።
እንዲህ ግን አይቀጥልም፤የሰላምና የፍትህ ብርሃን በቅርቡ መብራቱ አይቀርም፤እግዚአብሔር አለ።
“የምዋቹን ሞት አልፈቅድምና ይላል ጌታ እግዚአብሔር” ሕዝቅኤል 18:32
በአዲስ አመት አዲስ ነገር
ፍትህ መብት እንዲከበር
በሥራና በጸሎት
ይቻላል ምን ተስኖት!
ኢትዮጵያ ልማት ያስፈልጋታል።የተጀመሩ መልካም የሚባሉ ጅማሮዎች አሉ።ልማቱ እንዲቀጥል ግን ሰላም ያስፈልጋል።ያለ ሰላም ሰሞኑን እንዳየነው ልማት ይደናቀፋል።ሰላም ደግሞ የሚመጣው ፍትህ ሲኖር ነው።ፍትህ ከሌለ ዘላቂ ሰላም ብንፈልገውም በቀላሉ ማግኘት አይቻልም። ሀገር ሰላም የሚሆነው የህዝብ መብት ሲከበር ብቻ ነው፤ሰብዓዊ መብት ካልተከበረ መረጋጋት አይታሰብም።
ለዚህ ደግሞ ህዝብ የመፍትሔው አካል እንዲሆን መደረግ አለበት፤ህዝብ ሲባል ሰልፍ የወጡትና ዳያስፖራ ያሉ ኢትዮጵያውያን ተቃዋሚዎች፤ወጣቱም ጭምር እንጂ የመንግስት ደጋፊዎች ብቻ መሆን የለባቸውም።የተቃዋሚዎች ድምጽ በሀገሪቷ የመንግስት ሚዲያ መተላለፍ አለበት። በህዝቡ ቀረጥ የሚተዳደር ሚዲያ እስከሆነ በሀገር ውስጥም በዳያስፖራ ያሉትን የተቃዋሚን ድምጽ መስማት ነበረብን።እስካሁን ለዛ አልታደልንም። የኢትዮጵያ ዋና ገቢ ከዳያስፖራ በሚላከው ነው፤እነሱም ይደመጡ፤ “አክራሪ ፅንፈኛ” ብሎ ሁሉንም ማውገዝ፥መድረክ መከልከል፥እንደ ወንጀለኛ ማየት አግባብ አይደለም።እስካሁን ከሀገር ውስጥም ከውጭም የተቃዋሚ ድምጽ በመንግስት ሚዲያ አልተላለፈም።እንደዚያ ቢደረግ ለመፍትሔው ቅርብ እንሆናለን። የመንግስት ሚዲያ ማንኛውንም ኢትዮጵያዊ እኩል ማስተናገድ አለበት እንጂ ለአንድ ፓርቲ ብቻ ማድላት የለበትም።ህዝብ እንደተደመጠ ካወቀ ሊታገስ ይችላል። ያኔ መተማመን ይዳብራል እንጂ አሁን በህዝብና በመንግስት መካከል መተማመን እየጠፋ ነው።ዲሞክራሲ የሁሉንም ሃሳብ ማክበር ማለት ነው፤ከዚያ ህዝቡ በነፃ ምርጫ ይወስናል።”አንተ ጠባብ፥አንተ ትምክህተኛ፥አንተ አናሳ፥አንተ ደጋፊ፥አንተ ተቃዋሚ ” ብሎ አንዱ አንዱን ማግለል መፍትሔ አይሆንም። ከዘር ጥላቻና ከወንጀል ነጻ እስከሆነ ድረስ ሁሉም ለሀገሩ ጠቃሚ ያለውን የመናገር መብት ይኑረው። “አንተ እንደዚህ ነህ” ብሎ አንድን ንጹህ ኢትዮጵያዊ በአስተሳሰቡ ብቻ ማግለልና ስም ማጥፋት አይገባም። አንዱ የብሔር አስተሳሰብ አቀንቃኝ፥ሌላው ደግሞ የብሔራዊ(አገራዊ) አስተሳሰብ ያለው ይሆናል፤በሁለቱ ቃላት መሃል ያለው ልዩነት ዊ የምትለው ፊደል ብቻ ናት።እርግጥ ጥልቅ ክርክሮች በነዚህ ሁለት አስተሳሰቦች ይካሄዳል፤ግን ለመገዳደልና ለመጠላላት በፍጹም ሊያበቃ አይገባም።
በዚህ አጋጣሚ ለማሳሰብ የምንወደው ባለፈው “7 የመፍትሔ ሃሳቦች” መልእክታችን እንዳስተላለፍነው ዘርን መሰረት ያደረገ የጥላቻ ንግግርና ጥቃቶች ባስቸኳይ መቆም አለበት። ይህ ለወደፊት አብሮ መኖር አይበጅምና።በማህበራዊ ሚዲያ የሚካሄደው የዘር ጥላቻና የጥቃት ዛቻ የኢትዮጵያን ህዝብ አይመጥነውምና በአስቸኳይ መቆም አለበት። ሌላውን መጥላት መርዝ ጠጥተን የጠላነው ሰው እንዲሞት ማሰብ ነው። በ21ኛው ክፍለ ዘመን ጥላቻ ጊዜው አልፎበታል።እንኳን እንደ ሀገራችን ሃይማኖትና ባህል ያለው ህዝብ ቀርቶ ዛሬ በሳይንሳዊ መንገድ ጥላቻ ራስን ከመግደል ያለፈ ጥቅም እንደሌለው ተረጋግጧል። መቃወም አንድ ነገር ነው፥ ጥላቻ በፍጹም ሌላ ጉዳይ ነው። በሰማያዊውም በሳይንሳዊውም በሁለቱም የተወገዘ ነው።። እርግጥ ሰው ሲማረር ብዙ ያስባል፥ይሁንና በጥላቻ ከመሸነፍ በሰብአዊነት አሸናፊ መሆን የተሻለ ነው።
መንግስት እንደሚለው የህዝቡ ችግር መልካም አስተዳደርና ሙስና ብቻ ሳይሆን የሰብአዊ መብት፤የዲሞክራሲና የመንግስት ስልጣን ጥያቄ ነው።አሁን ቁጣው ገንፍሏል፤ብዙ ደም ፈሷል፤ነገሩ ተወሳስቧል። ነገሮችን አቅልሎ ማየት ለከፋ ችግር ሀገሪቷን ማጋለጥ ይሆናል።
የመረረው ህዝብ ከቁጥጥር ውጭ ከመሆኑ በፊት (እስካሁን ካልሆነ) ዛሬውኑ፤አሁኑኑ ይታሰብበት፤በሀገርም በውጭም ካሉ ተቃዋሚዎችና የፖለቲካ ድርጅቶች ጋር ውይይት ይጀመር፤ፓርቲዎች ያለ ተፅዕኖ ይንቀሳቀሱ፤ሚዲያው ነፃ ይሁን፤ተቃዋሚዎች በምክር ቤት እንዳይሳተፉ አንቆ የያዘው የምርጫ ህግ ይለወጥ።ከዚያም በተቃዋሚም በዓለም አቀፍ ህብረተሰብም ተቀባይነት ያለው ሀገራዊ ነጻ ምርጫ ይካሄድ። ያሸነፈውም ስልጣን ይረከብና ሀገሪቱን ይምራ፤እነዚህ ጥያቄዎች ህገ መንግስታዊ ከመሆናቸውም በላይ ዛሬ በዚህ ሰላማዊ መንገድ መሄድ ካልተቻለ የህዝቡ ቁጣ ከቁጥጥር ውጭ ሆኖ ነገ ይህ የውይይት በር ላይኖር ይችላል።
አንዳንድ ወገኖች “ብሄራዊ ውይይትና ነጻ ምርጫ የሚለው ሃሳብ አይሰራም ምክንያቱም መንግስት አይቀበለውም፤ስለዚህ በአመጽ ማስወገድ ብቻ ነው” ይላሉ። እንግዲህ እኛ እንደ ሰላም መልእክተኞች ሁሉም ወገን ድምጹ የሚሰማበት፥ ምርጫ ተካሂዶ በሰላማዊ መንገድ መፍትሔ እንዲያገኝ እስከ መጨረሻ እንወተውታለን። ህዝቡ ያላቋረጠ ግፊት ካደረገ መንግስት ለውጥ ለማድረግ እንደሚገደድ እናምናለን፤ስለዚህ ህዝቡ በመንግስት ላይ ሰላማዊ ግፊቱንና ተፅእኖውን ማጠናከር አለበት።
“ሰላማዊ እንቅስቃሴ የሚከለክሉ የአመጽ እንቅስቃሴን አይቀሬ ያደርጉታል” ብለዋል ፕሬዝደንት ኬኔዲ፤ቄስ ዴዝመንድ ቱቱ ደግሞ “ሰላም ከፈለክ ከጓደኛህ ጋር አትነጋገር፤ከተቃዋሚህ ጋር ነው መነጋገር ያለብህ”ብለው መክረውናል።
ሁላችንም ለሰላምና ፍትህ መስፈን የድርሻችንን እንወጣ።
“ኢትዮጵያ ተነሺ አብሪ አገልግሎት” ከሌሎች ወገኖች ጋር በመተባበር ድርሻችንን ለመወጣት እየሞከርን ነው።የሚመለከታቸውን በማነጋገር ላይ ነን።
የሃይማኖት አባቶች፥የሀገር ሽማግሌዎች፥ምሁራን፥በውጭ የሚገኙ ኢትዮጵያውያን እና ትውልደ ኢትዮጵያውያን፥የመገናኛ ብዙሃን፥የማህበራዊ ሚዲያ ተጠቃሚዎችና የሰብአዊ መብት ተሟጋቾች፥የዲፕሎማቲኩ ማህበረሰብ፥ሌሎቻችንም ለሀገራችን የሚጠቅም አቀራራቢ አሳቦችን መሰንዘርና ድምጻችንን ማሰማት፥የችግሩ ሳይሆን የመፍትሄው አካል መሆን ያለብን ጊዜው አሁን ነው፤11ኛው ሰአት ላይ ነንና!
መጽሀፉ እንደሚለው በጎ ሃሳቦች ያለ መካሪ ይበላሻሉ፤ብዙ ምክር ባለበት ግን ስኬት አለ።ምሳሌ15:22
የሚሰማ ጆሮ ያለው ይስማ!
 

ኢትዮጵያ አሁን የሚያስፈልጋት ሰላም ነው ወይስ ፍትህ?

ኢትዮጵያ አሁን የሚያስፈልጋት ሰላም ነው ወይስ ፍትህ?

 7ቱ የመፍትሄ  ሃሳቦች

ሀገራችን ከፍተኛ አጣብቂኝ ውስጥ ገብታለች።ምንም እንኳ በታሪካችን ብዙ መከራዎችንና የርስ በርስ ግጭቶችን ያሳለፍን ብንሆን እነዚያ አሁን መደገም አለባቸው ማለት አይደለም። እንዲያውም ካለፈው ተምረን በ21ኛው ክፍለ ዘመን ወደ ኋላ መመለስ አይገባንም። በተለይም ሀገራችን የአፍሪካ መኩሪያ እንደመሆኗ ባሁን ሰአት እየሆነ ያለው ከኛ የሚጠበቅ አይደለም።

ኢትዮጵያ ታማለች፤ፈውስ ያስፈልጋታል። ከዚህ አንፃር የሃይማኖት መሪዎች የበሽታው ሳይሆን የፈውሱ  አካል መሆን ይጠበቅባቸዋል። በጥበብ የተሞሉት ዮሴፍና ዳንኤል የዓለም መንግስታትን አማክረዋል፤በጎውንም መንገድ አሳይተዋል።

ምነው በኛ ጊዜ ጠፉ? ያን ጊዜ የረዳቸው በነርሱ ያደረ የአምላክ መንፈስ ዛሬም ህያው ነው።

“የምድር ጨው የዓለም ብርሃን ሁኑ” ምን ማለት ነው? ጨውነታችን እኮ ለምድር ነው፤ለሰማይ አይደለም።

ብዙዎች “ሀገሬ በሰማይ ነው፤ይሄ ምድር ያልፋል ዋጋ የለውም” በሚል ድሆችን ከመርዳት፤ለፍትህና ለሰላም ድምጽ ከመሆን ሲሸሹ ይታያል። ቃሉ “ፍርድ ለተጓደለበት ተምዋገት” ይላል፤”ተርቤ አላበላችሁኝም፤ታስሬ አልጠየቃችሁኝም” ይላል። እኛ እስረኞች የምንጠይቀው ወይም የፍርድና የፍትህ መጓደል የሚታወቀን የኛ ዘመዶች ሲታሰሩ ብቻ ነው መሰል። እነዚያን እኮ “ከእኔ ሂዱ” ነው ያላቸው።  ይሄንን ሁሉ ዘምረን፤ሰብከን፤ተሯሩጠን አገልግለን “ከእኔ ሂዱ” ከመባል ይጠብቀን። አንድ የሃይማኖት ድርጅት ለማስፋፋት እኮ አይደለም ጥሪያችን፤ይልቁንም ለሰው ልጆች ፍቅር እንድናሳይ እንጂ። የወንጌሉ ምርጥ ጥቅስ “ዓለሙን ወዷልና” አይደል የሚለው? ስብከቱ ይደርሳል መጀመርያ ፍቅር ለህዝባችን እናሳይ። አለበለዚያ “እኔ የምወደው የኔን ድርጅት አባሎች ብቻ ነው” ይመስላል።

አሜሪካዊው የሰብአዊ መብት ተከራካሪ ማርቲን ሉተር ኪንግ ፤በበጎ ስራቸው የዓለም ኖቤል ተሸላሚና የክፍለ ዘመኑ ምርጥ ሰው የተባሉት ማዘር ቴሬዛ፤ባርነትን ለመጀመርያ ጊዜ ህገወጥ እንዲሆን ያስደረገው እንግሊዛዊው ዊሊያም ዊልበርፎርስ፤ደቡብ አፍሪካ አፓርታይድ እንዲገረሰስ ታላቅ ሚና የተጫወቱት አርክቢሾፕ ዴዝሞንድ ቱቱ በሙሉ የ ቤ/ክ አገልጋዮች ናቸው። የዘመኑ ዮሴፎችና ዳንኤሎች። ዛሬስ ሰላምን፤ፍትህን፤እርቅን ለሀገር ለህዝብ እያመጣን ነው ወይስ ወንጀል ተፈጽሞበት በግፍ ደሙ የሚፈሰውን ምስኪን አልፈን ፍቅርና ህይወት ወደሌለው አገልግሎታችን እየተሯሯጥን ነው? አረጋግጥላችኋለሁ ጌታ “ከእኔ ሂዱ” ነው የሚለው። ለተደበደቡና ለሞቱት የሚቆሙ ደጋግ ሰማርያውያን የት አሉ?

ሁላችንም እንደምናውቀው በሀገራችን ባለፉት ሳምንታት ከፍተኛ ተቃውሞ ተነስቶ ብዙዎች ሞተዋል፤ቆስለዋል፤ ታስረዋል፤ንብረትም ወድሟል። እንደዚህ አይነት ነገር ሲሆን የመጀመርያ አይደለም፤ከዓመት በፊትም በተመሳሳይ ብዙዎች ሞተዋል(በወቅቱ ተመሳሳይ ማሳሰቢያ በተደጋጋሚ አውጥተን ነበር ethiopiariseandshine.com)። በዚህ ከቀጠለ ጠ/ሚኒስትሩ እንዳሉት ሀገሪቱ ወደማያባራ ጥላቻና መተላለቅ ውስጥ ልትገባ ትችላለች።

ሰሞኑን የጉዳዩ አደገኝነት አሳስቧቸው የኢትዮጵያ ሃይማኖት መሪዎች ስለሰላም እንጸልያለን ብለው ጾም ጸሎት አውጅዋል፤መልካም ነው።እዚያ ጋ ግን መቆም የለበትም። አድልዎ የሌለበት የማስታረቅ፤የማግባባት፤የማቀራረብ ስራ መሰራት አለበት። ፍትህ ላጡ መምዋገት መጽሃፉ ያዛል። የኦርቶዶክስ፥ካቶሊክና ፕሮቴስታንት ህብረት የሆነው ጂኒቫ የሚገኘው የዓለም አብያተ ክርስቲያናት ምክር ቤት ግድያው ቆሞ  ውይይት ባስቸኳይ እንዲጀመር አሳስቧል።

የተባበሩት መንግስታት የሰብአዊ መብት ከፍተኛ ኮሚሽን ሰለሞቱት ሰዎች አስቸኳይ ምርመራ እንዲደረግ ጠይቋል።

በዚህ አጋጣሚ ከተቃዋሚዎችም ከፖሊሶችም ለሞቱት ቤተሰቦች መጽናናትንና ብርታትን እንመኛለን።       ልናስተላልፍ የምንወደው 7 ነጥብ ያለው መልእክት እንደሚከተለው እናቀርባለን፤

1-ሰላማዊ ሰልፍ ስለወጡ ብቻ በሰላማዊ ሰዎች ላይ ግድያ እንዳይፈጸም እንጠይቃለን።

2-ያልተመጣጠነ ሃይል በመጠቀም በሰልፈኞች ላይ ግድያ የፈጸሙ ወገኖች በአስቸኳይ በህግ ይጠየቁ፤ይሄንንም የሚያጣራ ገለልተኛና በሁሉም ወገኖች ተኣማኒነት ያለው አጣሪ አካል  ምርመራውን ያድርግ፤

3-ከሰልፉ ጋር በተያያዘ ያላግባብ የታሰሩ እንዲሁም በተለያየ ምክንያት በወህኒ ያሉ የፖለቲካ ፓርቲ መሪዎችና ጋዜጠኞች መንግስት ለሰላምና ለመግባባት ሲባል ይፍታ። የእስረኞች ሰብዓዊና ህገመንግስታዊ መብቶቻቸው ተጠብቀው ከቤተሰብና ከጠበቆቻቸው ጋር ያለምንም ተጽዕኖ ይገናኙ፤ፍርድ ቤት የመቅረብ መብታቸው ይጠበቅ፤

ፍርድ ቤቶች ከማንኛውም የፖለቲካ ተጽዕኖ ነፃ ሆነው ፍትህን ይስጡ።

4-ህዝቡ ያቀረበው የፍትህ ጥያቄ በአስቸኳይ ተገቢው ትኩረት ይሰጠው፤ጥያቄዎቹም ይመለሱ።

5-በተለያዩ ወገኖች ያለውን ቁጣ የምንረዳ ቢሆንም ከጥላቻ ንግግሮችና ከዘር ተኮር ስድቦች ከጥቃትና ከሀይል ተግባሮች ሁሉም አካል እንዲቆጠብ እናሳስባለን።እንዲህ አይነት ነገር ሀገር የሚገነባ ሳይሆን የሚያፈርስ ነው። ስሜታችንን ተቆጣጥረን  የወደፊት ሀገርን  አንድነትና ህልውና ማስጠበቅ መቻል አለብን። እድሉ ያለን ዛሬ ነው። አንዴ ጥላቻው ከቁጥጥር ውጭ ከሆነ መመለሻ አይኖረውም።

6-ይህ ችግር እንዳይደገምና ሀገሪቷ ወደ ለየለት ሁከት እንዳትገባ በሀገር ውስጥም በውጭም ያሉ የሀገሬ ጉዳይ ያገባኛል የሚሉ ኢትዮጵያውያን ሁሉ በተወካዮቻቸው የሚሳተፉበት የውይይት መድረክ መንግስት ያዘጋጅ፤ይህን ውይይት የሚያመቻች ሁሉም ወገን የሚቀበለው ከሀገር ውስጥና አስፈላጊም ከሆነ ከዓለም አቀፉ ህብረተሰብ የተውጣጣ አካል ባስቸኳይ ይቋቋም። የወደፊቱም የሀገሪቱ አቅጣጫ መግባባትና በልዩነት አንድነት በሚፈጠርበት ሁኔታ ላይ ተመሳሳይ ብሄራዊ መረዳት ላይ ይደረስ።ለዚህም ያለ ማንም የፖለቲካ ተጽእኖ በተለይ የሃይማኖት መሪዎች፤የሀገር ሽማግሌዎች፤የሲቪክ ድርጅቶችና አስፈላጊ ከሆነ ዓለም አቀፉ ህብረተሰብ ድጋፉን ያድርግ።  

7-ከዚያ በመቀጠል  የሚደረገው ሀገራዊ ምርጫ ሁሉን ያሳተፈና በተቃዋሚውም በዓለም አቀፍ ደረጃም ተኣማኒነት ያለው ይሁን።

ኢትዮጵያችን ሰላምም ፍትህም ያስፈልጋታል

ሁላችንም የድርሻችንን ዛሬውኑ መወጣት እንጀምር

“በሰዎች መካከል ዕርቅና ሰላምን የሚያደርጉ የእግዚአብሔር ልጆች ስለሚባሉ ደስ ይበላቸው”

ዳንኤል ጣሰው

ከኢትዮጵያ ተነሺ አብሪ

ethiopiariseandshine.com