ከኢትዮጵያ ተነሺ አብሪ አገልግሎት የተሰጠ መግለጫ

 የኢትዮጵያ ጉዳይ አሳሳቢ ነው።ቀውሱ አልቆመም፤የመዳን ቀን ዛሬ ነው! 

በጥምቀት በዓልና በማግስቱ በወልዲያ የተፈጸመው አሳዛኝ ድርጊት ነው። ታዳጊ ወጣቶች፥ እናቶች፥በርካታ ወጣቶችና ጥቂት የጸጥታ ሃይላትም የተገደሉ ሲሆን በዘር ላይ ባነጣጠረ ጥቃት የብዙ ሰዎች ንብረትም ወድሟል።
የጸጥታ ሃይሎች ተመጣጣኝ ያልሆነ እርምጃ መውሰድ የለባቸውም። መሳሪያ ላልያዙ ወጣቶች ጥይት መተኮስ ሳይሆን በሌሎች መንገዶች ጸጥታን ማስከበር ይቻላል። በወልዲያ ተመጣጣኝ ሃይል ያልተጠቀሙ ሁሉ በአስቸኳይ ለፍርድ ይቅረቡ። በተለይ ይህ ግድያ የተፈጸመው በተከበረ የሃይማኖት በዓል ላይ መሆኑ አሰቃቂ ያደርገዋል።
እስከዛሬ የተኬደበት መንገድ አልሰራም። መግለጫዎች፥ውይይቶችና ቃል ኪዳኖች ተግባራዊ ስላልሆኑ ችግሩ ከመቀረፍ ይልቅ የመባባስ አዝማሚያ እያሳየ ነው። አንዳንድ የብሄራዊ መግባባት እርምጃዎች መወሰድ የተጀመሩ ቢሆንም ትንሽና እየዘገዩ ስለሆነ ብዙ አልጠቀሙም። መንግስት ለብሄራዊ መግባባት ሲባል በፖለቲካ ተሳትፎ ያላቸውን እስረኞችን በሙሉ በአስቸኳይ በመፍታት ዋና ዋናዎችን በሀገር ውስጥም በውጭም ያሉትን ተቃዋሚዎች ስብስቦ ብሄራዊ ውይይት ዛሬ ነገ ሳይባል መጀመር አለበት፤ነጻ ሚዲያና ነጻ ምርጫ ቦርድ፥ገለልተኛ ዓለም አቀፍ ታዛቢዎች ባሉበት ነጻና ፍትሃዊ ምርጫ በአስቸኳይ ይካሄድ ።
አገልግሎታችን ኢትዮጵያ ተነሺ አብሪ ከመንግስት፥በሃገርና በውጭ ካሉ ዋና ዋና ተቃዋሚዎች፥ከአሜሪካና አውሮፓ ህብረት ጋር እንዲሁም ከሃይማኖት መሪዎችና ሌሎች የሰላም መልዕክተኞች ጋር እየተነጋገርን ከዚህ በፊት የጀመርነውን የድርሻችንን ለመወጣት እየሞከርን ነው።
የወልዲያ ወጣቶች ለባለስልጣናት ያሉት መንግስት ለጥያቄዎቻችን መልስ አሁን ይስጠን ነገ አይደለም ብለዋል።
የመዳን ቀን አሁን ነው።
በወልዲያ ቤተሰብ ለሞቱባቸው እግዚአብሔር መጽናናቱን ይስጥ እንላለን።
eth rise
Advertisements

ፕሬዚደንት ትረምፕ፥አፍሪካና ወዳጄ ሳም

 

ሬቨረንድ ሳሙኤል ሮድሪጌዝ የአሴምብሊስ ኦፍ ጋድ ፓስተርና የ16 ሚሊዮን ላቲኖ ክርስቲያኖች ህብረት ፕሬዚደንት ነው።ለእኔም ወዳጄ ነው። በተለያዩ ስብሰባዎች ላይ አብረን ተካፍለናል።ፕሬዚደንት ትረምፕ ስልጣን የያዘ ቀን ስነ ስርዓቱን በፀሎት እንዲመራም መርጦት ነበር።የሳም መርህ ወንጌል ስርጭትን እንደ ቢሊ ግራሃም፥ ፍትህን እንደ ማርቲን ሉተር ኪንግ ይዘን መሄድ አለብን የሚል ነው። አሁንም ድረስ የትረምፕ አማካሪ ፓስተር ነው። ሰሞኑን ፕሬዚደንቱ በአፍሪካ ጉዳይ ተናገረ በተባለው ላይ የሚከተለውን ብሏል፥
“ሰው ሁሉ በእግዚአብሔር አምሳል ነው የተፈጠረው፤ያለ ምንም ልዩነት። ስለሆነም ኢሚግሬሽንን በተመለከተ ሁሉም ሰው ህጉን ተከትሎ መብቱ እንዲጠበቅ ያስፈልጋል።ከናይጄሪያም ሆነ ከኖርዌይ፤ከሆላንድም ሆነ ከሄይቲ እሴታችንን እስከተቀበሉና ሸክም ሳይሆኑ ለሀገራችን ተጨማሪ ግብአት እስከሆኑ ድረስ እኩል መስተናገድ አለባቸው።ከዚህ በተጨማሪ ግን ከታላቅ አክብሮት ጋር የምናገረው ፕሬዚደንቱ አሉ የተባለው ነገር በመጨረሻው ጥሩ እይታ እንኳን ብናየው ሊባል የሚችለው የተሳሳተ፥የማይገባና ጎጂ አስተያየት መሆኑን ነው።ለምን? እግዚአብሔር እነዚህን ሀገሮች ሲያይ እንደ ልጆቹ ነውና የሚያያቸው።”

sam2

SamDan

የወንጌል አማኙ አቶ በቀለ ገርባ

ከጥቂት ጊዜ በፊት ከኢትዮጵያ አብያተ ክርስቲያናት ህብረት መሪዎች አንድ ነገር ሰማሁ ስለ አቶ በቀለ ገርባ።ውይይታችን በወቅቱ የኢትዮጵያ ጉዳይና በአገልግሎታችን ኢትዮጵያ ተነሺ አብሪ ስለምናካሂደው የሰላም ጥረት ነበር። ስለ ተቃዋሚ ፓርቲ መሪዎች ስንነጋገር ነው እንግዲህ የአቶ በቀለ ጉዳይ የተነሳው። አቶ በቀለ የወንጌል አማኝ እንደሆነና በግል እንደሚያውቁት አንድ የአብያተ ክርስቲያናቱ መሪ ነገሩኝ።ሲቀጥሉም በጣም የተወደደ ሰላማዊና ታማኝ አማኝ እንደሆነ በፍጹም በሌላ ነገር እንደማይሰማራ አረጋገጡልኝ። እንዲያውም ማንም ሰው ስለርሱ ማንነት መረጃ ቢፈልግ የኛ ቤተ ክርስቲያን አባል ነውና መልስ ለመስጠት ዝግጁ ነኝ አሉኝ።
በነገራችን ላይ በሌላ ጊዜ ከዶክተር መረራ ጋር ስንጫወት በኛ ፓርቲ ውስጥ እንደ በቀለ ገርባ በሰላማዊ ትግል የሚያምን የለም፤እንደውም የማርቲን ሉተር ኪንግን ነውጥ አልባ መጽሃፍ በኦሮምኛ የተረጎመ ነው ያሉኝን አስታውሳለሁ።የመጽሃፉ ስም “ህልም አለኝ” የሚል ነው።
በቅርቡ እንደተረዳሁት የአቶ በቀለ ክስ ከሽብርተኝነት ወደ ተራ የወንጀል ክስ ወርዷል። ይህን ታዋቂና ብዙ ደጋፊዎች ያሉትን ሰው እንዲሁም ሌሎች የፖለቲካ መሪዎችና ጋዜጠኞች መፍታት ለብሔራዊ መግባባት የራሱን ሚና ይጫወታል ብለን እናምናለን። በዶክተር መረራ የተጀመረው በጎ እርምጃ በዚሁ ይቀጥል።
እግዚአብሔር ኢትዮጵያን ይባርክ።

bekele-gerba

Bekele_Gerba1 (2)

የዶክተር መረራ ጉዲና መፈታት ለኢትዮጵያ ሰላምና ፍትህ በጎ አስተዋጽኦ ያደርጋል

የዶክተር መረራ ጉዲና መፈታት ለኢትዮጵያ ሰላምና ፍትህ በጎ አስተዋጽኦ ያደርጋል
የፊታችን ረቡዕ January 17 ይፈታሉ።
 
አንዳንዶች እንደምታስታውሱት ዶክተር መረራ የታሰሩ ጊዜ መግለጫ አውጥተን ነበር። እርሳቸው በሳል የፖለቲካ መሪ እንደሆኑና ለሚደረጉ የሰላምና የመግባባት ጥረቶች ሁሉ ተባባሪ እንደነበሩ። ሆኖም ግን መንግስት በወንጀል ጠርጥሮ እንዳሰራቸውም ጠቅሰን ነበር።
በአገልግሎታችን ኢትዮጵያ ተነሺ አብሪ መንግስትንና ተቃዋሚዎችን ፊት ለፊት የማቀራረብና የማነጋገር ስራ እንሰራለን። በዚህ ሂደት ውስጥ አንዱ ቁልፍ ተሳታፊ ዶክተር መረራ ነበሩ።ለሰላምና ፍትህ መስፈን ያላቸውን ፍላጎትና ትጋት አደንቃለሁ። በኋላ ግን ከመንግስት ባለስልጣኖች ሁከትን በማነሳሳት ወንጀል እንደሚጠረጠሩና ለዚያም ማስረጃ እንዳለ ተነገረኝ። እኔም በወቅቱ ዶክተር መረራ በወንጀል ስራ ይሳተፋሉ ብዬ እንደማላምንና እኔ እስከማውቃቸው ሰላማዊ እንደሆኑ ተከራከርኩ። ቢሆንም ግን ይሄንኑ መረጃ ወዲያውኑ ለዶክተር መረራ በመንገር ጥንቃቄ እንዲያደርጉ አሳሰብኳቸው።የተፈራው አልቀረም ታሰሩ። በኋላም ጉዳዩን ስንከታተል ቆይ የአስቸኳይ ጊዜ አዋጁ ይነሳና ጉዳዩ ሊታይ ይችላል የሚል ተስፋ አገኘን። አሁን ስለሚፈቱ በጣም ደስ ብሎናል።ለኢትዮጵያ ሰላምና ፍትህ ቁልፍ ሚና አንደሚጫወቱ አውቃለሁ።
እኔ እንደገባኝ ኣሁን ይፈታሉ የተባሉት በክስ ላይ የነበሩ ሲሆኑ ተፈርዶባቸው ያሉት የምህረት ፕሮሰሱ እንዳለቀ ይፈታሉ ብለን እንጠብቃለን።
ሁሉም የፖለቲካ መሪዎች፥ጋዜጠኞችና ተቃዋሚዎች ይፈቱ ዘንድ ጥሪያችን እያቀረብን መንግስት በውጭም ሆነ በውስጥ ካሉ መሳሪያ ካነገቡት ጭምር ጋር በመነጋገር ወደ ሃገራቸው ገብተው በነጻና ፍትሃዊ ምርጫ እንዲሳተፉ እንዲፈቅድ ጥሪ እናቀርባለን።ከዚህ በተጨማሪ የጸረ ሽብር ህጉ ለዲሞክራሲ አሉታዊ ሚና እየተጫወተ ስለሆነ እንዲሰረዝ ወይም እንዲሻሻል እንጠይቃለን።
አገልግሎታችንም ከሌሎች ወገኖች ጋር በመተባበር የብሔራዊ መግባባት ጥረታችንን እንቀጥላለን።

እውነትን ወይስ ፍቅርን…የትኛውን?

እውነትን ወይስ ፍቅርን…የትኛውን?

ከቅርብ ጊዜ ወዲህ በሶሻል ሚዲያ በተለይም በፌስቡክ የሚታይ ሚዛን ያለመጠበቅ ነገር አለ።ወደ አንድ ጫፍ መስፈንጠር ይበዛል። አንድ ትክክለኛ ነገር ያዝን ማለት በሁሉም ትክክል ነን ወይም ሚዛን የጠበቀ አካሄድ ነው ማለት አይደለም።
በፌስቡክ የሚታየውን ፈር የለቀቀ እንቅስቃሴ የሚያደርጉት “ፌስዳቢዎች” እንደተባሉ ሰምቻለሁ። የፌስቡክ ተሳዳቢዎች ማለት ነው። ይህ ደግሞ የሚታየው በሁሉም ጎራ ነው። በተለያዩ ሃይማኖቶችና ቤተ እምነቶች እንዲሁም በፖለቲካው መድረክ አካባቢ ጭምር።ልዩነቱ እስከማይታወቅ ድረስ በእግዚአብሔር ስም የሚሰዳደቡት ከፖለቲካው ያልተለየ ሆኗል። ይህ ምን ማለት ይሆን? በአንድ አጀንዳ ላይ አሸናፊና ትክክል ሆኖ ለመውጣት እግዚአብሔርን ማሰደብና ጥላቻን በመዝራት ከወንድምና እህታችን ጋር ያለውን የፍቅርና የመከባበር መስመር መቁረጥ ምን ይባላል? የወንጌል ዓላማ ሰውን ማዳን ነው ወይስ በኔ መንገድ ካልሄድክ ገፍቼ እጥልሃለሁ ነው?
ጳውሎስ “ከአሸናፊዎች እንበልጣለን” ሲል እኮ ከመሸናነፍ መንፈስ አልፈን ፉክክር ወደሌለበት ከፍ ያለ አድማስና ልምምድ ውስጥ ነን ማለቱ እኮ ነው።
ለሀገርስ ቢሆን ከራስህ ዜጋ ጋር መጠላላት ምን ይፈይዳል? ነገ እኮ ልትዋለድ ትችላለህ፤ወደኋላ ብትቋጠርም ይሄኔ ዘመድ ትሆናለህ።ወዳንተ ሃሳብ ሰው እንዲመጣ ከፈለክ በምን ሂሳብ ነው ስድብ የሚያመጣው? ወይስ በተስፋ መቁረጥ አጥፍቶ መጥፋት መሆኑ ነው?
መጽሃፍ ቅዱስ በኤፌ4:15 “እውነትን በፍቅር እየያዝን” ይላል። በአንዳንድ ትርጉሞች “እውነትን በፍቅር በመናገር” ይላል።
አንዳንድ ወገኖች እውነትን ስለያዝኩ መቆጣት፤ማውገዝ፤መዝለፍ መብቴ ነው ይላሉ።
ሌሎች ደግሞ በተቃራኒው እኔ ምን አገባኝ፤ከሰው ጋር በፍቅር አርፌ ለምን አልኖርም፥ምን አጋጨኝ? ይላሉ፤ስህተትን እያዩ ዝም ይላሉ።
እንግዲህ እዚህ ጋር የምናየው ሁለት በተለያየ ጎራ ያሉ ወገኖችን ነው።ሁለቱም ጋር የተወሰነ ትክክል የሆነ ነገር አለ፤ሁለቱም ግን ለጥጠውት መጠኑን አልፈዋል። እንግዲህ እዚህ ጋር ነው “እውነትን በፍቅር” የሚለው የሚገባው፤ሚዛናዊነት የሚገባው እዚህ ጋር ነው ማለት ነው።
እውነት ወሳኝ ነገር ነው። ነጻ የሚያወጣው እውነት ነው፤መፍትሔ የሚሆነው እውነት ነው።
እዚህ ጋር ግን አንድ ጥያቄ ልጠይቅ፤እውነት ያለው ማን ጋር ነው? የትኛው ጎራ ነው እውነቱ ያለው? በምን እርግጠኛ መሆን ይቻላል? ከታሪክም ሆነ ከገሃዱ ዓለም የምናየው እውነትን ይዘናል የሚሉ አብዛኞዎቹ እንዳልያዙት ነው።አይ እኔ የተለየሁ ነኝ እኔ ጋር ያለው በእርግጥም እውነት ነው፤ማስረጃውም ይሄ ይሄ ነው እንላለን።አንዳንዴ ያ ነገር ትክክል ቢሆንም ብዙ ጊዜ ሙሉ እውነት ላይሆን ይችላል። ግማሽ ብርጭቆ ውሃ ያዩ ሁለት ሰዎች ተቃራኒ የሚመስል ግን እውነት የሆነ ነገር ሊናገሩ ይችላሉ። አንዱ ብርጭቆው እኮ ግማሽ ባዶ ነው ብሎ እዚያ ላይ ሲያከር ሌላው ደግሞ ብርጭቆው ግማሽ ሙሉ እኮ ነው ብሎ ሊጮህ ይችላል።
ሁለት ዓይነ ስውራን ዝሆንን ሲያዩ አንዱ እግሩ አካባቢ በመዳሰስ የዝሆኑ አካል ያ ብቻ ሊመስለው ይችላል፤ሌላው ደግሞ ሌላኛውን አካሉን በመዳሰስ ዝሆን ማለት እርሱ የዳሰሰው ብቻ ሊመስለው ይችላል።
“ከዕውቀት ከፍለን እናውቃለን” ይላል ጳውሎስ።ስለዚህ እውነትን አውቄ ጨርሻለሁ ከማለት ይልቅ የደረስኩበት ይሄ ነው በማለት በትህትና ማስረዳትና የሌላውን ሃሳብ ማክበር አስፈላጊ ነው።ጥልቅ በሆነው በመንፈሳዊና በዶክትሪን ጉዳይ እንኳ ብዙ የምናከብራቸው አብያተ ክርስቲያናትና መሪዎች አይስማሙም። በጥቅሱ ላይ ሳይሆን በትርጉሙ ስለሚለያዩ የየራሳቸው እውነት የሚሉት ትርጓሜ አላቸው። በመሆኑም ትሁት መሆንና ምናልባት እኛ ከምናውቀው ሌላ ተጨማሪ ዕውቀት ካገኘን ተወያይቶ፥ጥያቄ ጠይቆ አቋምን ለመቀየር እንኳ ዝግጁ መሆን አለብን።
“የትም ብትወስደኝ እውነትን እከተላለሁ”፤ በዚህ ጉዳይ ሌላ ጊዜ በሰፊው እመለስበት ይሆናል።
ስለዚህ ከምናውቀው የማናውቀው ስለሚበልጥ ለጠብና ለጥላቻ ራሳችንን አናጋልጥ።የደረስንበትን ግን ያለፍርሃትና ማመቻመች እናስረዳ።
ሌላው ፍቅር የሚለው ቃል ነው።ዋው፥ከዚህ የበለጠ ቃል በዓለም ላይ አለ? ተነግሮም ተጽፎም የማያልቅ ከውቅያኖስ የበለጠ ጥልቅ የሆነ የዓለማችን ታላቁ ስጦታ።
ወንጌል “ከሁሉ የሚበልጠው ፍቅር ነው” ይላል።አንድ የብሉይ ኪዳን ሊቅ እንዲህ አለ “የመጽሃፍ ቅዱስ ዋናው መልዕክት አምላክህንና ባልንጀራህን እንደራስህ ውደድ ነው።ሌላው ሁሉ የዚህ ትዕዛዝ ማብራሪያ ነው”። ኢየሱስም “ከትዕዛዛቱ ሁሉ የሚበልጠው ይህ ነው፥ህግም ነቢያቱም በዚህ ተሰቅለዋል” ብሏል። የወንጌል ማዕከላዊ ጥቅስ የሚባለው “ዓለሙን እንዲሁ ወዷልና” የሚለው ቃል ነው።
ሰዎች ተዋደው ተጋብተው የሰውን ዘር እንዲተኩ አምላክ ያዘጋጀው መንገድ፥የመኖራችን ምክንያት። የእናት ፍቅር፥የልጅ ፍቅር፥ የወዳጅ ፍቅር፥ የሀገር ፍቅር ወዘተ ባጠቃላይ የህይወታችን ትርጉም ፍቅር ነው።የቃሉን ፊደላት ስንከፋፍል ፍጽምና፥ቅድስና፥ርህራሄ ብዬዋለሁ። ለፍቅር የሚከፈል ዋጋ አይቆጭም። ከመጽሃፍ ቅዱስ ተወዳጅ ምዕራፎች አንዱ 1ኛ ቆሮንቶስ13 ነው።የፍቅር ምዕራፍ ይባላል። እውነትን ያለፍቅር ብንናገር ማን ይሰማናል? መሬት እንኳ ተቆፍራ ካለሰለሰች ፍሬ አትሰጥም።ሴት ልጅን በፍቅር ካልቀረብን የጥቅስ ጋጋታ ብቻ ለትዳርና ለግንኙነት አይማርካትም።
ኢየሱስ “እግዚአብሔር የሚመለከው በእውነትና በመንፈስ ነው” አለ።ምን ማለት ነው? እውነት አይበቃም፥መንፈስ ያስፈልጋል፥ያም ማለት እውነትን የሚያለሰልስ፥በቀላሉ እንዲፈስ፥ተቀባይነት እንዲያገኝ፤ለሰዎች እንዲበራ የሚያደርግ መንፈሱ ነው። ፍቅር ደግሞ አንዱ የመንፈስ ባህርይ ነው። ስለዚህ እውነት ብቻ ይዞ መሄድ ባልተቆፈረና ባለሰለሰ መሬት ላይ እንደመዝራት፥ሴትን በንግግር ብቻ ለማሳመንና ለማግባት እንደመሞከር ማለት ነው።አይቻልም፥አይሆንም፥ፍሬ አያፈራም፥እውነትን በፍቅር!
በፌስ ቡክ ያለው ደረቅ ክርክርና ጥላቻ ለቤተክርስቲያንም ሆነ ለሀገር መፍትሔ አያመጣም።

ፌስዳቢዎች አስተውሉ።እድሜያችሁን በከንቱ አትጨርሱት። ለተቺና ለተሳዳቢ የተጻፈ ታሪክም ሆነ የቆመ ሀውልት የለም።ትረሳላችሁ።መረሳት ብቻ ሳይሆን ለልጅ ልጆቻችሁ የሚተርፍ መጥፎ ሌጋሲ፤አሻራ ትታችሁ ትሄዳላችሁ። የተነጋርነው ሁሉ በአምላክ ፊት የሚያስጠይቀን ሲሆን በዘመናዊ ቴክኖሎጂም ቢሆን ሬከርድ ስለተደረገ ብትጸጸቱ እንኳ ለዘላለም ታሪክ ሆኖ ስማችሁን ያጎድፋል።
ባልና ሚስት እውነት እውነት ብቻ ቢሉ አንድ ቀን አብረው መኖር አይችሉም።ለሰላምና ለፍቅር ሲሉ እየተሸናነፉ ነው።
ቤት በግ የሆነ ሰው ፌስ ቡክ ላይ አንበሳ ሲሆን ደስ አይልም።
በመጨረሻ ማለት የምፈልገው እውነትን በፍቅር ተናገሩ። እውነት መሆኑን አረጋግጡ፥ለመማማር ቦታ ይኑራችሁ።
ስለ ፍትህና ሰላም ተናገሩ፥እውነት ነውና፤ስለ ወንጌል ተናገሩ፥ እውነት ነውና። ሁሉ ግን በፍቅር ይሁን።
አንድ የጥንት መነኩሴ ባለው ልዝጋ፥
“በመሰረታዊ ነገሮች አንድነት፥
መሰረታዊ ባልሆኑ ልዩነት፥
በሁሉም ግን ቸርነት።

Reverend Daniel Tassew

መንግስትና ተቃዋሚ ፓርቲዎች በሰብአዊ መብት ዙሪያ ሊነጋገሩ ነው።

መንግስትና ተቃዋሚ ፓርቲዎች በሰብአዊ መብት ዙሪያ ሊነጋገሩ ነው።

በብዙ መቶዎች ከሞቱ፥በአስር ሺዎች የሚቆጠሩ ከታሰሩ በኋላ የተጠራው ይህ ስብሰባ ከማክሰኞ Nov. 29, 2016 ጀምሮ የሚካሄድ ሲሆን የሚቆየውም ለ ፫ ቀናት ነው።

ባለው የሰብአዊ መብት ጥሰት ዙሪያ እውነተኛ ውይይት ተካሂዶ ተጨባጭ ለውጥ ይመጣ ዘንድ ጸሎታችን ነው።

ሊመጣ ያለው የአሜሪካ አስተዳደር ከጽድቅ፥ከፍትህና ከዓለም ሰላም አንፃር፤

ግብረሰዶማዊነት፥ፀረ እስራኤልነትና የነጭ ዘረኝነት በነጩ ቤተ መንግስት፤

ከቅርብ ሳምንታት ወዲህ በአሜሪካ አመራርና ምርጫ ላይ አተኩረናል። ይሄም የሆነው በሁለት ምክንያት ነው፤በአሜሪካ ስለምንኖርና እንደ ጌይ፥ውርጃ፥ስደተኞች፥የድሆች እርዳታ፥የዓለም ሰላም ያሉ ጉዳዮች የወንጌል አጀንዳ ስለሆኑ፥ጸሎታችን በዕውቀት እንዲሆንና ማድረግ የሚጠበቅብንን ሁሉ እንድናደርግ ነው። የምንሰጠው መረጃም ሆነ የምናስተላልፈው መልዕክት አንዱን ወገን ለመደገፍ ሳይሆን ዓላማው እውነትን በፍቅር መግለጽ ነው።ያ ጉዳይ አንዳንድ ጊዜ አንደኛውን ተመራጭ ወይንም ያኛውን ሊነካ ይችላል፤የኛ ዓላማ ግን ያ አይደለም።
ሌላው ምክንያታችን በአሜሪካ የሚሆነው ነገር በኢትዮጵያም ሆነ በመላው ዓለም ላይ ተጽዕኖ ስላለው ነው።
የጥንት ነቢያት በፍትህ፥በድሆችና ስደተኞች፥በክፋት ጉዳይ ቤታቸው እየጸለዩ አልተቀመጡም፤ወደ አደባባይ በመውጣት ሲጮሁና ዕውነትን ሲያውጁ፥ለህዝቡ እውቀትና መልዕክት ሲያስተላልፉ ነበር።
የዘንድሮ ክርስትና የቲዎሎጂ ክርክር፥የእርስ በርስ መፎካከርና መበላላት ነው ። የእኔነት ክርስትና፤ እኔ ልዳን፥እኔ ልባረክ፥እኔ ልበልጽግ፥እኔ ልፈወስ፥እኔ ልዘምር፥ልደሰት። ኢየሱስም ሆነ ሃዋርያቱ ስለነርሱ መባረክና መበልጸግ ሳይሆን በፍቅር ዓለምን ስለመቀየር፥ራስን መስዋዕት ስለማድረግ ነው ያሳዩን። ወደፊት በስፋት እንመለስበታለን።

ከወንጌል የፍትህ፥የጽድቅና የሰላም አጀንዳ ጋር ስለሚገናኘው የአሜሪካ አመራር ጉዳይ ልግባ።

የ Dec.19 የኤለክቶሬት ኮሌጅ ምርጫ ትረምፕን እንደሚመርጡ ዕድሉ የሰፋ ሲሆን ከዚያ ውጭ ይወስናሉ የሚለው በጣም አናሳ እንደመሆኑ ዳነልድ ትረምፕ ፕሬዚደንት ይሆናል ብለን በመውሰድ ልንጸልይለት ይገባል። ይሄንንም ባለፈው ጽሁፋችን መግለጻችን ይታወሳል።

ትረምፕ በተመሳሳይ ጾታ ጋብቻ ጉዳይ ሃሳቡን በመቀየር እንደተቀበለውና ውርጃ የሚፈልጉ በሚፈቀድበት ስቴት እየሄዱ እንዲያደርጉ፥የመጓጓዣ ችግር ካለ ሁኔታው እንደሚታይ መናገሩን አካፍለናችኋል።

የትረምፕ ዋና አማካሪ ተደርጎ የተሾመው ፀረ ሴት፥ፀረ አፍሪካውያን፥ፀረ እስራኤልና ፀረ ኢሚግራንት እንደሆነ የሚነገረው ስቲቭ ባነን የነጭ ዘር የበላይነትን ለሚያስፋፉ ድርጅቶች መድረክ በመሆን ራሱም ሃሳቡን በማስፋፋት ይታወቃል። በቅርብ ቀን ኢሚግራንቶች ደህና ደህና ቦታዎችን ሁሉ ይዘውታል ይህ መቆም አለበት ብሏል። ከእንግዲህ ወዲህ ስራ በችሎታ ሳይሆን ቅድሚያ ለነጮች እንዲሰጥ ማለት ነው።አይሁዶችን አልወድም ብሎ እንደተናገረም ታውቋል።ለሴቶችና ለአፍሪካውያን የወረደ፥የንቀት አመለካከት እንዳለው ተረጋግጧል። ሴቶች በኢንተርኔት ትንኮሳ እየተደረገባቸው ነው ሲባል መፍትሄው ሴቶች ኢንተርኔት አለመጠቀም ነው ብሏል። 169 የኮንግረስ አባላት ስቲቭ ባነን ከነጩ ቤተ መንግስት ባስቸኳይ እንዲወጣ አሳስበዋል።

የሁለት መንግስታት መፍትሄ በሚለው ሃሳብ መሰረት ትረምፕ እራሱ እስራኤልንና ኢየሩሳሌምን ከፋፍሎ ግማሹን ለአረቦች መስጠት እንደሚፈልግ በቅርብ ቀን ፍንጭ አሳይቷል። 

ጌዮች ብዙ ገንዘብ ለትረምፕ የሰጡ ሲሆን ሪቸርድ ግረነል የትረምፕን ያህል ጌዮችን የሚወድና የሚደግፍ ማንም የለም ብሏል። የእነርሱን ባንዲራም ሲሰጠውና ትረምፕም ወደላይ ከፍ አድርጎ ሲያውለበልበው በቅርቡ ዓለም ሁሉ ያየው ጉዳይ ነው። ግረነል በዓለም መንግስታት የአሜሪካ ዋና አምባሳደር ይሆናል ተብሎ እየተጠበቀ ሲሆን ከሆነ እንደዚህ ዓይነት ከፍተኛ ስልጣን በመያዝ በአሜሪካ ታሪክ የመጀመሪያው ጌይ ይሆናል።

ሌላው ለብዙዎች አሳሳቢ የሆነው የልጆቹና የአማቾቹ አራጊ ፈጣሪ የመሆን ስጋት ነው። ምንም የፖለቲካ ልምድ የሌላቸውና የአባታቸውን ትዕዛዝ የሚያስፈጽሙት የቤተሰቡ አባላት ጉዳይ ካሁኑ ችግር እየፈጠረ ሲሆን ታዋቂውና ተደናቂው የኒው ጀርዚ ገቨርነር ክሪስ ክሪስቲ በዚህ ምክንያት እንደተባረረ ታውቋል።

የዓለም ሁለተኛ ትልቁ ሀብታም ዋረን በፈት እንደ ትረምፕ ዓይነት ስሜታዊና ተበቃይ ሰው የኑክሌር ቦምብ በእጁ መግባቱ ከሁሉም በላይ ያሳስበኛል ብሏል። የዓለም መንግስታት አብዛኛዎቹ በከፍተኛ ስጋት ላይ ይገኛሉ። ሀገሮች የየራሳቸው ኑክሌር ቦምብ ቢኖራቸው ይሻላል ማለቱ የሚታወስ ሲሆን ገንዘብ ካልከፈላችሁን ወታደሮቻችንን ከዓለም ዙሪያ እናስወጣለን ማለቱ እንደ ራሽያ፥ሰሜን ኮሪያና ኢራን ላሉ ኑክሌር ቦምብ ላላቸው አገራት ጦርነት ለማስነሳት በር የሚከፍት አደገኛ አካሄድ ነው ተብሎ ተሰግቷል። አሜሪካ ለዓለም ሰላም የምታደርገውን በጎ አስተዋጽኦ ወደ ንግድ ሊቀይረው ነው የሚሉ እየተበራከቱ ነው።ከዚህ በተጨማሪ የሙስሊሞችን ቁጣ በማነሳሳት በአሜሪካ ውስጥም ሆነ በዓለም ዙሪያ አላስፈላጊ ፍጥጫና ጦርነቶችን የሚቀሰቅስ አዝማሚያ እያነሳሳ ነው ይላሉ። የአውሮፓ ሀገራት መሪዎች አሁን በአሜሪካ የሚታየው የነጭ ዘር የበላይነት እንቅስቃሴ ወደ አውሮፓ ተዛምቶ በኢሚግራንቶች ላይ ከፍተኛ ችግርና ሁከት ያስነሳብናል ብለው ይሰጋሉ።የእንኳን ደስ ያለህ መልዕክት በመጀመሪያ ያስተላለፉት የአምባገነን ሀገር መሪዎች እንደሆኑ እየተዘገበ ነው። የራሽያ፥የሶሪያና የፊሊፒንስ መሪዎች ደስታቸውን ቀድመው የገለጹት ናቸው።መጀመሪያ በግንባር የተገናኙት የጃፓኑ ጠ/ ሚ አቤ ሲሆኑ ትረምፕ በምርጫ ዘመቻ የተናገረውን ከምር እንዳይወስዱት በአማካሪዎቹ ተነግሯቸዋል።

ከዚህ በተጨማሪ በትረምፕ ዩኒቨርሲቲ የወንጀል ድርጊት ምክንያት ጉዳዩ በፍርድ ቤት ከመታየቱ በፊት ትረምፕ ሰሞኑን ለከሳሾች 25 ሚሊዮን ዶላር በመስጠት እንዲሁም 1ሚሊዮን ዶላር ለኒው ዮርክ ከተማ ቅጣት በመክፈል ፋይሉ እንዲዘጋ አድርጓል።

ትረምፕ ነጋዴ እንደመሆኑ መጠን ንብረቱን በሙሉ ካልሸጠና ከንግዱ ዓለም ሙሉ ለሙሉ ካልወጣ (ለዚህም እስካሁን ፈቃደኛ አልሆነም) የጥቅም ግጭት ስለሚኖር ጉዳዩ ወደ ኢምፒችመንት፥ ከስልጣን የሚያወርድ ክስ ሊያደርስ ይችላል ሲሉ የህግ አዋቂዎች እየተናገሩ ነው።

አብዛኛው ነጭ ፕሮቴስታንት ትረምፕን የመረጠ ሲሆን አብዛኛው ላቲኖ፥አፍሪካን አሜሪካንና ኢሚግራንት ክርስቲያን ሂለሪን መምረጣቸው ታውቋል። በመላው ዓለም ያሉ አብዛኛዎቹ ወንጌላውያን አማኞችና መሪዎች በነጮቹ ምርጫ በመገረም ቅድስናን ያስተማሩን ሚሽነሪዎች እንዴት እንዲህ አደረጉ በሚል የአሜሪካን ክርስትና በመጠራጠር ላይ እንደሚገኙ ታውቋል።ጽድቅ የሚመጣው በወንጌል ስብከትና በፍቅር አገልግሎት እንጂ የአሜሪካ ቤተ ክርስቲያን ከፖለቲካ ሰዎች ለውጥ መጠበቋና በአንድ ሰው ላይ እንደዚህ መታመኗ ያሳዝናል፥ይህ የክርስቶስ መንገድ አይደለም ብለዋል።

ጥላቻና ዘረኝነት በኢሚግራንቶች ላይ መንግስታዊ ሊሆን ነው የሚሉ የተበራከቱ ከመሆኑም በላይ በመላው ሃገሪቱ ያሉ ኢሚግራንቶችና የመላው ዓለም ህዝብ በፍርሃት የተዋጠበት ጊዜ መሆኑ የብዙዎች እምነት ሆኗል።

ከዚህ በላይ የጠቀስናቸው ጉዳዮች በፍትህ፥በፅድቅና በሰላም ዙሪያ ያጠነጠኑ ናቸው። በተለይ ለአሜሪካ ሸክም ያላችሁ፥ በአሜሪካ በኩል መልካም ነገር ለዓለም እንዲተላለፍ ለምትፈልጉ ለመረጃና በዕውቀት ለመጸለይ እንደጠቀማችሁ እናምናለን።

ወደፊት ለአዲሱ ፕሬዚደንት አስተዳደር ለስደተኞች፥ለዝቅተኛ ገቢ ዜጎች፥ለኢሚግራንትና ለማይኖሪቲ መደረግ ስላለበት የሚጠቅሙ መጽሃፍ ቅዱሳዊ ሃሳቦች ይዤ እመለሳለሁ።ባሉን ግንኙነቶች በአማካሪዎቹ በኩል ሃሳባችንን እናካፍለዋለን። እግዚአብሔር የድሆች አምላክ ነውና።

ማሳሰቢያ፥
ዶነልድ ትረምፕ ጌታ እንዲረዳው እንጸልይለት፥ወደ ራሱ ሃሳብ እንዲያመጣው።
እግዚአብሔር በዙፋኑ ላይ ነው፤ሁሉን ለበጎ ይለውጠዋል፤
ወሬው ሁሉ የሚያስፈራ፥የሚሆነው ባለም ዙሪያ፥
እየከፋ ሲሄድ ጊዜው፥መሸሸጊያ ኢየሱስ ነው።